Шырша шамдары жарқырап тұр

Жаңа жыл жақындаған сайын елорда да ерекше ажарланып тұр. Жарық шамдар, алып шыршалар мен мұздан жасалған қалашықтар көпшілікті ертегідегідей әсеме. Тұрғындар сарышұнақ аязға қарамай қысқы қалашықтарда көңіл көтеріп жүр.

Сүндет Оралбек, Тілші:

- Осындай жарық шамдар қала көркіне көрік қосып, ажарын одан сайын аша түскен. Қазір мұз қалашықтары бой көтерді. Мұнда коньки теуіп, сырғанап, уақытты қызықты өткізуге болады.

Қаланың 6 ауданында 40 шырша қойылды. 57 коньки тебетін арнайы орын ашылды. Алматы ауданы да әсем күйге енген. Қыстың қақаған аязына қарамастан мұнда адам аяғы үзілмейді. Әсіресе, шанасын сүйреткен балалар мен жастар көп. Демалыс күндері, кешке таман бұл қалашықтар адамға лық толады. Ине шаншыр орын болмайды.

Шамдар мен түрлі-түсті ойыншықтарға көмкерілген жаңа жылдық шыршалар мен мерекелік қалашықтар алыстан-ақ көз тартып, шаһарға ерекше сән береді. Қаладағы адам ең көп серуендейтін саябақтарда орнатылған шыршалардың биіктігі 20 метрден асады. Бұдан бөлек, тұрғындар үшін дәмді тағам ұсынатын фудкорттар, сондай-ақ мерекелік көңіл күйді есте қалдыруға мүмкіндік беретін арнайы фотозоналар да ұйымдастырылған. Мұнда үлкен-кіші демей, әркім қыстың қызығын сезініп, жаңа жылдық атмосфераға бөленіп жатыр.