«Рахмет саған, туған ел» патриоттық әндер байқауы өтті

Бүгін астаналық оқушылар арасында «Рахмет саған туған ел» атты патриоттық әндер байқауы өтті. Байқаудың басты ерекшелігі жарысқа оқушылар өз әкелерімен бірге қатысады. Бірінші кезеңге 200 мектептен өтінім түсіпті. Оның тек 16-сы іріктеліп, бүгін сахна төрінде өнер көрсетті. Толығырақ тілшіміз баяндасын.

Бұл сахна бірнеше жыл қатарынан әке мен баланы ән әлемінде тоғыстырып келеді. «Рахмет саған туған ел» патриоттық байқауында бүгін жоғары сынып оқушылары бақ сынады.  Түрлі аспаптарын арқалап келген өнерпаздардың ішінде 14 жасар Мансұр да бар. Ол бұл байқаудың тұрақты қатысушыларының бірі.

Мансұр Азатқали, қатысушы:

- Бүгін біз Ұшқын Жамалбектің мен қазақтың баласы деген әнін орындап береміз. Бұл қазақ өзінің қазақ екенін елін мақтанышпен айтатыны туралы айтады осы өлеңде.Бұл конкурсты бір ай бұрын айтты. Содан бері дайындалдық. Қарсыластарыма сәттілік, бізге жеңіс.

Өнер бәйгесінің басты мақсаты - ата-ана мен баланың шынайы қарым-қатынасын қоғамға дәріптеу. Балаға көңіл бөлу қиынға соққан заманда бұл шара көпке үлгі дейді ата-аналар. Қатысушы әкелердің арасында сахнаға алғаш шыққандары да, бірнеше жыл қатарынан қатысып жатқандары да бар.

Шалқар Қабылбек, қатысушының әкесі:

- Осы байқауға ұсыныс келіп түскенде қатты қуандық. Қазіргі қоғамға байланысты әкелер мен ұлдардың қоғамдағы рөлі, ұрпақтар сабақтастығы ретінде жақсы қабылдадық. Осы байқауға жақсы дайындықпен келдік. Аздаған қобалжу бар. 

Сайыс екі кезеңнен тұрады. Бірінші кезеңі онлайн өтіпті. Оған Астананың 200-дей мектебінен өтінім келіп түскен.  Ал бүгінгі сахнада  сондағы ең үздік 16 команда іріктеліп алыныпты. Бірі домбырамен күй төгілтсе, екіншісі терме айтып, таңдай қақтыруда.

Бекдайыр Күзенбай, Республикалық әкелер одағының қоғамдық бірлестіігі төрағасы:

- Әке мен баланың қарым қатынасы. Әке әрқашан өз баласының тұлға болып қалыптасуына үлкен септігін тигізеді. Бұл жерде енді патриоттық әндер айтылатын болғандықтан  келе жатқан тәуелсіздік мерекесіне орай, патриотизмге баулуды көздейді.

Байқау жеті жыл қатарынан Тәуелсіздік күні қарсаңында ұйымдастырылып келеді. Мамандар алдағы уақытта осыған ұқсас шараларды көптеп ұйымдастырмақ. Сахнада бұл қойылымдар туған жерге алғыс, елге адал қызмет сияқты құндылықтарды дәріптемек.