Президент жарлығымен Ақтөбенің 46 тұрғыны марапатталды

Республика күні қарсаңында Ақтөбе өңірінің үздіктері марапатқа ие болды. Жалпы 46 адам арнайы орден медальдармен наградталды. Медицина, білім, спорт және мәдениет майталмандарына сый-сыйапат көрсетілді. 

Мерекелі шараны атап өту үшін Ақтөбе жұрты қаладағы «Өнер» орталығына жиналды. Әр саланың майталман үздіктері шақыртылған. Президент жарлығымен наградталғандар арасында қыстағы ақтүтек боранда тайсалмастан шақыртуға барған фельдшер Сая Рысбай да бар. Ол бүгін «Шапағат» медалін иеленді.

Сая Рысбай, фельдшер, «Шапағат» медалінің иегері:

– Әлі күнге дейін түсінбей жүрміз. Біз тек өз жұмысымызды істедік. Артық ештеңе болған жоқ. Өте ерекше сезім. Жұғысты болсын. Мереке құтты болсын.

Жалпы Президент жарлығымен Ақтөбенің 46 тұрғыны марапатталды. Оларға «Парасат», «Құрмет» ордендерімен қоса «Ерен еңбегі үшін» және тағы басқа медальдар табысталды.

Мирас Бегжанов, әнші, ҚР еңбек сіңірген қайреткері: 

– Қуанышты күн мен үшін. Үш күн бұрын ел Президенті жарлыққа қол қойған екен. Соның ішінде мен де бармын. ҚР еңбек сіңірген қайраткері атағын алып отырмын. Қуаныштымын.

Ақтөбе жұрты биылғы су тасқыны кезінде ауызбіршілік танытып, қиын қыстау кезеңнен қысылмай шықты. 500 үй салынып, 513-і сатып алынды. Өңір жұртының бұл ерлігін аймақ басшысы да ерекше атап өтті.

Асхат Шахаров, Ақтөбе облысының әкімі:

– Баршаңызды мерекемен құттықтаймын. Отбасыларыңызға амандық тілеймін. Бақ -береке тілеймін. Тәуелсіздігіміз тұғырлы болсын. Республикамыз гүлдене берісін!

Салтанатты шара соңы мерекелі концертке ұласты.