Президент Түркістан облысының әкімін қабылдады

Бүгін Қасым-Жомарт Тоқаев Түркістан облысының әкімін қабылдады. Нұралхан Көшеров Мемлекет басшысына өңірдің әлеуметтік-экономикалық дамуы мен алдағы кезеңге арналған жоспары туралы баяндады. Айтуынша, былтыр өңірдің экономикалық өсімі 113,9 пайызды құраған. Мемлекеттік бюджетке түсетін салық түсімдері 1 триллион теңгеге өсіпті. Аймаққа 1,7 триллион теңге инвестиция тартылған. Оның 1,4 млрд-ы шетелдік кәсіпкерлердің қаржысы. Сонымен қатар, өңір басшысы өткен жылы 58 Инвестициялық жоба іске қосылып, 8 мың жұмыс орыны ашылғанын айтты. Қазір облыста 21 индустриалдық аймақ жұмыс істейді. «Turan» арнайы экономикалық аймағында 26 жоба қолға алынған. Жалпы құны – 315 миллиард теңге. Бұдан бөлек, агро секторда мақта-тоқыма, жүгері және ет өндірісі кластерлері дамып келеді. 2027 жылға қарай ауыл шаруашылығы өнімдерінің көлемі қосымша 479,5 миллиард теңгеге артады деп күтілуде. Ал, Қасым-Жомарт Тоқаев инвестиция тарту, ауыл шаруашылығы мен өндірісті өркендету бағытындағы жұмысты жалғастыруды тапсырды. Сондай-ақ, халықтың тұрмыс сапасын арттыру, жаңа жұмыс орындарын ашу және инфрақұрылымды дамыту мәселелеріне ерекше назар аудару қажет екенін айтты.