Президент чемпиондарды марапаттады

Бүгін Президент Ливерпульде өткен бокстан әлем чемпионатында ел абыройын асқақтатқан спортшылар мен олардың бапкерлерін қабылдады. Қазақстан боксшылары 7 алтын, 1 күміс, 2 қола жеңіп алып, 68 мемлекеттің арасында командалық есепте ел құрамасы бірінші орынға ие болды. Бұл жеңіс - тарихи оқиға. Санжар Тәшкенбай және Махмұд Сабырхан әлемнің екі дүркін чемпионы атанды. Төрехан Сабырхан мен Айбек Оралбайдың ерекше өнеріне жаһан жұрты тәнті болды. Байрақты додада қыздарымыз жеңістің жарқын үлгісін көрсетті. Президент мұндай жетістік жылдар бойғы табанды еңбекпен, маңдай термен келгенін атап өтті.