Планетада әлі 1,6 трлн баррель мұнай бар - рас па? Қазақ мұнайына алғаш инвестиция салған ағайынды Нобельдер

Саясаттан әрқашан мұнайдың, ал мұнайдан саясаттың иісі шығып тұрады. 20 ғасырдың басында айтылған бұл цитата әлі күнге өзекті. Қара алтынға тәуелділіктен адамзат арыла қойған жоқ. Мұнай әлем экономикасында стратегиялық және негізгі энергия көзі болып отыр. Заманауи тарихта қақтығыстардың көпшілігі мұнайға иелік ету және транзитті бақылау үшін болды. Дегенмен оның ролі 20 ғасырдағыдай абсолютті үстем емес, біртіндеп жағдай өзгеріп келеді. Жаһандық энергия тұтынуда мұнай үлесі жылдан жылға азаюда. Бүкіләлемдік банк пен түрлі халықаралық ұйымдардың деректеріне сүйеніп OUR WORLD IN DATA ғылыми басылымы жариялаған статистикаға сенсек, 2020 жылдан бері жалпы энергия тұтынудағы мұнайдың үлес салмағы шамамен бір пайыз мөлшерінде кеміп отырған. Бес жыл ішінде жалпы әлемдегі қуат тұтынудағы қара алтын қолданысы 32,5 пайыздан 29,5 пайызға дейін төмендеген. Бұл мұнай өндірісі және тұтыну мөлшері кеміді дегенді білдірмейді. Балама энергия көздері көбейді дегенді білдіреді. Былтыр бір жылдың ішінде альтернативті энергияны қолдану мөлшері 2 пайыз артқан. Қалай болған күнде де қара алтынның қадірі кеткен жоқ. Тіпті бір-бірімен жауласушы мемлекеттер мұнай өнімдерін алып-сатып, тасымалдау мәселесіне келгенде үздіксіз жұмысты қамтамасыз етіп отыр. Бүгінгі хабарымыз мұнай нарығының қазіргі ахуалы жайлы болмақ.