Моңғолияға Қазақстан тауарын экспорттау жеңілдейді

Енді Моңғолия нарығына Қазақстан тауарларын экспорттау жеңілдейді. Сенат Еуразиялық экономикалық одақ пен Моңғолия арасындағы Уақытша сауда келісімін мақұлдады. Келісім екі ел арасындағы саудадағы техникалық кедергілерді жоюға және жеңілдетуге негізделген. Құжат үш жылға жарамды. Әрі, оны ұзарту мүмкіндігі де бар. Яғни, Қазақстан Моңғолияға дәнді дақылдар, құс еті, сүт өнімдері, майлар, кондитерлік өнімдер, металлургиялық және химиялық өнімдер, көлік құралдары және т.б. тауарларды экспорттайды. Ал, Моңғолия тарапы баж салығын алып тастауға міндеттеледі. Әрі, елге жылқы етін, картоп, пошта маркалары мен өзге де бағалы қағаздарды, шұлық тауарларын, аяқ киім және басқа да тауарларды импорттайды.

Әлібек Нәутиев, ҚР Парламенті Сенатының депутаты:

- Өз кезегінде Қазақстанның экспорттық мүддесі толықтай қамтамасыз етілген. Моңғолия азық-түлік өнімдері мен өнеркәсіптік тауарларға импорттық кедендік баждарды алып тастайды. Еліміз үшін экономикалық тиімділіктеріне тоқталсақ, моңғол тарапының тарифтік жеңілдіктері республикамыздың Моңғолияға экспортының 92 пайызын қамтиды. Нәтижесінде, отандық бизнес импорттық кедендік баждарды төлеу кезінде үнемдеуге қол жеткізеді.

Бұдан бөлек, Моңғолия ЕАЭО елдерінен, оның ішінде Қазақстаннан келетін жеңіл автокөліктерді, электр көліктерін, жүк көліктерін, өрт сөндіру машиналары мен қосалқы бөлшектерді толық бажсыз әкелуге міндетті. Айта кетейік, Қазақстан мен Моңғолия екіжақты тауар айналымын 500 млн долларға дейін арттыруды көздеп отыр. Бұл межеге сауда және әкімшілік кедергілерді кезең-кезеңімен жою арқылы қол жеткізу жоспарланып отыр.