Композиторлар қаламақыдан қағылуда

Отандық композиторлардың құқығын қорғамаса, әбден қаламақыдан қағылатын түрі бар. Өйткені музыкалық шығарманың авторлары өз туындысы үшін түсетін ақының тек 30 пайызын ғана алуға құқылы. «Қалған 70 пайызы сонда қайда?» дерсіз. Анықталғандай, ол «авторлық қоғам» дейтін ұйымдардың қалтасына түседі. Қазір Қазақстанда осындай 15-ке жуық ұйым тіркелген. Яғни, жоқ жерден ақша тауып, мұрттарын майлап жүр. Соңғы екі жылдың өзінде олардың шотына 1 млрд 550 млн теңге түсіпті. Бұл ақшаның тек 439 млн теңгесі ән мен музыка жазып жүргендерге қаламақы ретінде берілген. Мәселен, қазақ вальсінің королі - Шәмшінің ұрпағына 55 ән үшін зияткерлік меншік құқығы есебінде небәрі 22 мың теңге ғана төленіпті. Енді сол ақшаның өзі де азайып, 18 мың теңге болып қалған. Мәжілісмен Нартай Сәрсенғалиев бұлай заңды бұзып жүргендерге тыйым қойып, авторлық қоғам дегеннің бәрінің қызметін тексеру қажет деп отыр. Әділет министірі мәселені білемін дейді.