Көкшетау мен Бурабайда тұрғындарға баспаналар берілді

Ақмола облысында биыл 2 мыңнан астам отбасы жаңа пәтерге ие болды. Баспаналардың бірқатары өткен демалыс күні пайдалануға берілді. Сөйтіп мереке күндері облыс орталығының 20 тұрғыны қоныс тойын тойлады. 

Баспаналы болғандардың бірі – Наурызбай Имақанов. Үш баласы бар. Пәтер алу үшін екінші топтағы мүгедек ретінде 2007 жылдан бері кезекте тұрған. Бүгін оған жаңа баспана бұйырды.

Наурызбай Имақанов, Көкшетау қаласының тұрғыны:

– Үйдің тұрған жері жақсы, орталыққа жақын. Үйдің айналасында бәрі істелген. Балаларға да жағдай жасалған, мектеп те жақын мына жерге. Жалпы жақсы, үйдің бәрі оңды. Бәріміз қуанып жатырмыз. Мың да бір рақмет.  

Пәтерлерді кейін жекешелендіруге болады. Мұндай жаңашылдық Көкшетау қаласында биыл алғаш рет іске қосылды. 

Марат Ахметжанов, Ақмола облысының әкімі:

– Ұзаққа созылып, салынатын үйлер емес. Осы тауар ретінде, дайын үйлерді таңдап тұрып ішінен, ең жақсы, ең жайлы, ең қолайлы, қолжетімді объектілері бар, адамдар тұрып жатқан, ауласы дұрыс үйлерді таңдап, сатып алатын бағдарлама. 

Пәтер алу бақыты Бурабай кентінің тұрғындарына да бұйырды. 50 отбасы қоныс тойын тойлап жатыр. Курортты аймақта кезекте тұрғандар үшін жаңа үйден пәтерлер сатып алынды. 

Наталья Уаисова, Бурабай кентінің тұрғыны:

– 11 жыл бойы кезекте тұрғанбыз, көпбалалы отбасы ретінде. Бүгін міне үлкен қуаныш болып жатыр, пәтер алып жатырмыз. Өте қуаныштымыз. Бес баланың анасымын. 3 бөлмелі, 84 шаршы метр. Өте ұнады.  

Биыл Ақмола облысында 2 мыңнан астам отбасы баспанамен қамтылды. Оның 600-і облыс орталығынан болса, 1500 жанұяға аудандарда үй берілмек.