Қазақстан мен Ресей тауар айналымы 30 млрд долларға дейін артады

11-12 қарашада Президент Ресейге мемлекеттік сапармен барады. Қасым-Жомарт Тоқаев Владимир Путинмен кездесуде көлік-логистика, сауда айналымын дамыту, инвестициялық жобалар, мәдени-гуманитарлық байланыс секілді өзекті мәселелер талқыланады деп жоспарланып отыр. Бірқатар маңызды құжатқа да қол қойылуы мүмкін. Ал, бүгін мемлекет басшысы Ақордада Ресей Федерациясы Үкіметі Төрағасының бірінші орынбасары Денис Мантуровты қабылдады. Қасым-Жомарт Тоқаев алдағы сапарға ерекше мән беріп отырғанын және келіссөздердің табысты өтетініне сенім білдірді. Президент Ресей Қазақстанның жетекші сауда-экономикалық серіктестерінің бірі болып қала беретініне тоқталды. Алдағы уақытта екіжақты тауар айналымын 30 миллиард долларға дейін арттыру көзделіп отыр. Былтыр жалпы инвестиция көлемі 4 миллиард долларға жеткен. Ресей Үкіметі Төрағасының бірінші орынбасары тараптар бірлескен жобаларды дамытуға берік негіз қалағанын айтты. Және Мемлекет басшысы оған екі ел арасындағы достық пен ынтымақтастықты нығайтуға, сондай-ақ әлеуметтік-экономикалық және мәдени қарым-қатынастарды дамытуға елеулі үлес қосқаны үшін І дәрежелі «Достық» орденін табыстады.