Кәсіпкерлер үшін қолма-қол ақша шешу тәртібі өзгерді

Кәсіпкерлер үшін қолма-қол ақша шешіп алу тәртібі өзгерді. Жаңа талап 1-қаңтардан бастап күшіне енген. Оған сәйкес, енді шағын бизнесте жүргендер ай сайын 20 млн, орта бизнес – 120 млн, ал ірі кәсіптегілер 150 млн теңгеге дейін ғана қолма-қол ақша шешіп алуға құқылы. Одан асқан жағдайда банкке өтініш беріп, заңға сәйкес рұқсат алуы қажет. Өтініште ақшаны нақты қайда жұмсайтыны көрсетілуі тиіс. Жалпы бұл 2020 жылдан бері қолданыста бар норма. Тек енді өзгеріс - шекті сомадан асқан жағдайда қаржының не үшін қажет екенін құжатпен дәлелдеуі және мәліметтерді Мемлекеттік кірістер комитетіне жіберуге келісім беруінде.  Тексерістен кейін оған рұқсат беріледі, не берілмейді. Оның критерийлері жарияланбайды, құпиялық қағидаты сақталады. Бұл жемқорлықтың алдын алып, көлеңкелі әрекеттерді азайтуға бағытталған шара.