Қараөткел ауылына табиғи газ берілді

Астана іргесіндегі Қараөткел ауылына табиғи газ берілді. 1 мыңға тарта үйдің тұрғындары енді қақаған қыста көмір тасып, от жағып, күл шығармайды. Ұзындығы 100 шақырымға жуық газ құбыры сағатына 11 мың текше метр көгілдір отын жеткізе алады. Бұл елдімекенді үздіксіз әрі тұрақты газбен қамтамасыз етуге мүмкіндік береді. Қараөткел тұрғындарын талай жыл толғандырған мәселе шешілді. Ауылға табиғи газ жетті. Көгілдір отынға қолы жеткендердің бірі - Рұқия Оспанова. Осыған дейін көмір жағып, бейнет кешкен. Қазір қуанышында шек жоқ. Табиғи отынға қосылып, қолым ұзарды, - дейді.

Рұқия Оспанова, Қараөткел ауылының тұрғыны:

- Осы елдімекенде тұрып жатқанымызға 7-8 жыл болды. Содан бері көмір тасып, күл шығарумен әлек едік.  Енді кешеден бері газ жаққанға түнімен ұйықтай алмай, рас па, рас емес пе деп. Үйіміз жып-жылы, пешті қараудың қажеті жоқ. Қандай қуаныш біз үшін, осы шағымызда. Рақмет үлкен.

Елдімекеннің мың шықты үйі көгілдір отынға қосылды. Ұзындығы 100 шақырымға жуықтайтын құбыр сағатына 11 мың текше метр газ тасымалдайды. Бұл 4107 шаңырақты қамтамасыз етуге жетеді. Жауаптылар келер жылдың көктеміне дейін ауылды толық газға қосамыз дейді.  

Уәлихан Қымбатов, «Qazaq Gaz Aimaq» АҚ Астана өндірістік филиалының директоры:

- Қараөткел ауылы 5 газ кезеңіне бөлінген. Соның бүгін 3 кезеңін қосамыз. 1 газ реттегіш пункт, және 23 газ реттегіш кафтар жүзеге асырылды. Жоба жоспар бойынша 2027 жылы бітіру керек еді. Бірақ, техникалық, проекттік өзгерістер енгізгеннен кейін осы жобаны 2025 жылдың желтоқсанында газға қосуға мүмкіндік туды.

Бастама тұрғындардың өмір сапасын жақсартып, кәсіпкерлерге қолайлы жағдай жасайтыны сөзсіз. Игі қадам экологиялық ахуалға да оң әсерін береді. Айта кетейік , қазір Ақмола облысының Нұрлы, Шұбар, Аққайың, Талапкер, Ыбырай Алтынсарин, Қоянды ауылы және Қосшы қаласы, Сондай-ақ, Астананың «Кірпішті», «Family Village», «Тельман» тұрғын алаптарына табиғи газ берілген. Барлығы 22535 шаңырақ көгілдір отынға қосылды.