«Есірткісіз қала» акциясы басталды

Астанада «Есірткісіз қала» акциясы басталды. Науқан аясында бүгін спортшылар мен журналистер, блогерлер студент жастарға дәріс оқыды. Алдағы уақытта бағдарлама негізінде түрлі спорт шаралары мен семинар дәрістері өткізілмек.

Жастарды есірткіге елітетін жарнамалар әлеуметтік желідегі жасырын топтарда, ватсап чаттарда көп. Алдымен сенімге кіріп, сырласады. Кейін қиындықты жеңудің жеңіл жолы бар деп сендіреді. Осындай арам пиғылдылардың арбауына түспес үшін, бүгін елордалық студенттерге нашақорлықтың зияны жайлы дәріс өткізілді.

Юлиана Эберле, 3-курс студенті:

- Бүгін университетімізде осындай шараның болып жатқаны қуантады. Бұндай дүниені айту керек. Жан жаққа тарату керек. Бұл мәселе қоғамымызда өте маңызды. Бұл дүниенің барлығы адам денсаулығына зиянды. Жастар осындай танымал тұлғалардың айтқаны көпке үлгі,өнеге деп санаймын.

Тәртіп сақшылары жыл басынан бері қалада мыңнан астам құқықбұзушылықты анықтапты. Оның ішінде 300 -дей күдікті қылмыстық жауапкершілікке тартылған. Олар 475 келі есірткіні тасымалдапты.

Әлия Қибатқызы, Астана қаласы полиция департаменті бөлім басшысы:

- Аталған шараның мақсаты тек полиция қызметкерлерімен ғана емес, біз өз тарапымыздан әрқашан осындай дәрістер өткіземіз. Біз енді бүгінгі шараға осындай аты танымал тұлғаларды әртістер, спортшыларды шақырып, өз тараптарынан нашақорлықтың алдын алу үшін осындай іс-шараларды өткізудеміз. Яғни тек қылмыспен күрес ғана емес, заңсыз есірткіге деген сұраныстың азаюы.

Бүгінгі студенттерге спортшылар мен журналистер, блогерлер келіп дәріс оқыды. Олар жастардың жаман жолға түспеуі баланың ортасына байланысты екенін айтады. Сондықтан, жаңа қалаға келгендер алдымен жақсы дос пен жанашыр орта табуы маңызды дейді.

Динара Сәтжан, Журналист:

- Наркотиктің зиянын бәрі біледі. Бірақ қалай бұл жолға түспеу керегін білмейді. Сол жолды көрсету керек. Студент болса да, бос уақыты болады.Сол бос уақытты қайда жұмсайсың, Сол уақытты жұмысқа жұмсау керек. Мен өзім студент кезде, түске дейін оқуда, түстен кейін жұмыстамын. Бізде уақыт жоқ басқа нәрсеге. Сол үшін осындай кездесулер өте маңызды деп ойлаймын.

Осы себепті де «Есірткісіз қала» науқанында тек семинарлар мен тәрбие сағаттары ғана емес, түрлі жарыстар мен спорт шаралары да өткізіліп жатыр.Ол  Заң мен тәртіп қағидаты аясында ұйымдастырылған. Келешекте басқа білім ордаларында да жалғасады.

Авторы: Мақпал Рахатқызы