Энергетикалық сусындарды 21 жасқа дейінгілерге сатуға тыйым салынады

Енді 21 жасқа дейінгі азаматтарға энергетикалық сусын сатқандар жауапқа тартылады. 100 мыңнан бастап, 1,5 млн-ға дейін айыппұл төлеуі мүмкін. Осы ретте, сергітетін сусынға тәуелді боп қалған жастар көп. Қазір адам ағзасына аса қауіпті сусынның 300 литрі сатылымнан алынды. Тіпті олардың кейбірінің құрамы мүлде түсініксіз, ішіндегі кофеин мен тауриннің мөлшері шамадан тыс көп боп шыққан.

Мақпал Рахатқызы, тілші:

- Мына бір құты энергетикалық сусынға осындай 10 ас қасық кофе, 20 ас қасық қант қосылады. Бұл бір бөтелкенің қуаты 4-5 шыныаяқ кофемен бірдей дегенді білдіреді. Мұның ішінде мың мг таурин бар. Ал ол  жүректі қысып, қатерлі ісікке дейін апарады.

Мұндай сусынды көбіне жасөспірімдер сатып алады.  Бірі қызық көріп, дәмін татқысы келеді. Енді бірі ұйқысырамай, сергек жүрі үшін ішеміз дейді.

- Ішуге болмайды, адамға өте зия келтіреді

- Бұрын ішкенмін, дәмі ұнайды, сергектік сыйлайды.

- Шектеу жастардың денсаулығы үшін деп ойлаймын.

Елде соңғы он жылмен салыстырғанда, зиянды сусынның сатылымы 5 есеге артыпты. Тіпті халықтың 3 пайыздан көбі оны күн сайын сыңғытады. Олардың қатарында, шамадан тыс тұтынып, тәуелді болғандар. Тіпті соның кесірінен бүйрек, бауыр, жүрегі ауырып, төсек тартып қалғандар көп.

Жанна Нұрберген, дәрігер-нутрициолог:

- Психологиялық тұрғыдан түсінуі керек адам. Энергетикалық сусындар адамның бойында энергия күш береді дегеннен арылу керек. Оны алмастыратын бірден бір нәрсе ол – су. Кәдімгі қара су.

Енді елде 21 жасқа дейінгі азаматтарға энергетикалық сусынды сатқандар заңмен жазаланады.  Оларға 100 мың теңгеден  бастап, бір жарым миллионға дейін айыппұл салынады. 

Әсел Қыдырәлиева, ҚР Денсаулық сақтау министрлігінің ресми өкілі:

- Соңғы жылдары біз мұндай сусындардың сатылымын қатаң қадағалап жүрміз Әсіресе оны 21 жасқа дейінгілерге сатуға болмайды. Заңдағы бұл өзгерістер сатылымды азайтып, жастар арасындағы түрлі аурулардың алдын алады деп ойлаймыз.

Елде осындай құрамы түсініксіз 300 литр энергетикалық сусынды сатылымнан алып тастаған.  Олардың ішінен түрлі зиянды қоспа мен адам ағзасына улы химикаттар табылды дейді мамандар. Мұндай түзетулер Әкімшілік кодекске биылдан бастап енгізілді.

Мақпал Рахатқызы, Қожабек Аханов.