Еліміздің минералдық-шикізат базасы ұлғаяды

«Қазатомөнеркәсіп» минералдық-шикізат базасын ұлғайтпақ. Қазір жалпы ауданы мың шаршы шақырымнан асатын 6 учаскеде геологиялық барлау жүргізіп жатыр. Бұл туралы компания басшысы Президенттің қабылдауында болғанда айтты. Мейіржан Юсуповтың айтуынша, жасанды интеллект технологиясының қарқынды дамуына байланысты уранға сұраныс артады. Өйткені дата-орталықтар  энергияны көп тұтынады. Бұған қоса жаңа атом реакторлары салынып жатыр. Соның әсерінен 2030 жылдан кейін әлемде уран тапшылығы сезілуі ықтимал. Айта кетейік, «Қазатомөнеркәсіп» компаниясының нарықтағы капитализациясы 14 миллиард доллардан асып, тарихи жоғары межеге жетті. Акцияларының құны IPO-ға шыққалы бері 4 жарым есе өсті. Президент «Қазатомөнеркәсіп» компаниясын әлеуметтік маңызы бар бастамаларға белсенді атсалысуға шақырды.