Digital Nauryz 2026: дрон-футбол турнирі өтті

Дрондардың футбол ойнағанын көргенсіз бе? Технология қарыштап дамыған заманда бұл да шындыққа айналды. Робототехника мен киберспортты біріктірген бірегей спорт - дрон-футбол деп аталады. Бүгін Елордада осындай турнир ұйымдастырылды. Жауаптылар мұндай бастама болашақта тың технологиялық шешімдірді әзірлейтін жаңа буын қалыптастырады, - дейді.

Бұл - диаметрі 20 см болатын доп пішіндес дрон. Яғни, кішкене ғана квадракоптерді берік қорғаныс қабықшасымен қаптаған. Ойын барысында осы дронды шеңберден өткізу керек. Сырт көзге оңай көрінуі мүмкін. Алайда, командалық ауызбірлік болмаса бәрі бекер.

Саян Әбдіжаппар, ұйымдастырушы:

- Бұл ойында 1 командада 5 адам болады. 3 қорғаушы, 2 шабуылшы. Бұл ойын біріншіден жаңа, 21 ғасыр талаптарына сай келеді. Екіншіден бұл жерде робототехника, киберспорт біріккен.

Бүгінгі жарысқа 12-17 жас аралығындағы оқушылардан құралған 5 команда қатысты. Бәсекеде топ жарғанда бағалы сыйлықтарға ие болды, ал қатысушыларға серіктестер атынан түрлі сыйлықтар табысталды.

Айдын Есбек, «Astana Invest» қалалық инвестицияларды дамыту орталығы» ЖШС жоба менеджері:

- Мұның маңызы өте зор. Себебі, оқушылар инженерлік жағынан да, командалық ойын жағынан да жан-жақты дамиды. Кеййіннен біз адами капиталды ары  қарай дамытып, бұл болашақта агроөнеркәсіп болсын, басқа болсын дрон саласында жұмыс істеп, өздерін дамыта алатын болады. Бұл өте маңызды. Себебі, цифрландыру жылы болғаннан кейін болашақпен бірге қадам басудамыз.

Іс-шара аясында қонақтарға интерактивті бағдарлама ұсынылды. AI-аватарлар Наурызай мен Наурызбай қонақтарға Наурыз мейрамының дәстүрлері мен мерекелік бағдарлама туралы мәлімет берсе, робот келушілерді сүйемелдеп, мерекелік көңіл күй сыйлады.