Дәрігерлердің жалақысы көбейеді

Биыл инфекциялық бөлімшелер мен жедел жәрдем қызметкерлерінің жалақысы өседі. Соңғы жылдары салаға бөлінген қаржы 3 есе артып, былтыр 3 трлн теңгеге жетті. Бұл медициналық ұйымдардың материалдық-техникалық базасын жаңартуға мүмкіндік берді. Нәтижесінде Астана мен Алматы қалаларында республикалық маңызы бар бірнеше нысан бой көтерсе, ауылды жерлерде 650-ден астам медициналық мекеме халық игілігіне берілді. Әлеуметтік қолдау шаралары да қолға алынған. Соның арқасында дәрігер тапшылығы 19 пайызға, орта медициналық персоналдың жетіспеуі 7 процентке төмендеді. Ал елдімекендердегі маман тапшылығы 16 пайызға азайған. Сонымен қатар, дәрігерлерді қорғау туралы заң мақұлданды. Қызметтік міндетін атқару кезінде оларға күш қолданғандар қылмыстық жауапкершілікке тартылады. Бұдан бөлек, дәрігерлердің кәсіби жауапкершілігін сақтандыру тетігі де іске қосылды.

Тимур Сұлтанғазиев, ҚР Денсаулық сақтау бірінші вице-министрі:

- Сақтандыру моделіне көшуді, халықты қамту көлемін кеңейтуді және медициналық қызметтер сапасын мемлекеттік бақылауды қалпына келтіруді көздейтін Міндетті әлеуметтік медициналық сақтандыру жүйесін жетілдіру жөніндегі заң қабылданды.

Енді обыр ауруына шипа іздеп, шекара асудың қажеті жоқ. Елімізде қатерлі ісікті емдеуде дәлдігі жоғары әдістер қолданылып жатыр. Одан бөлек, ана мен баланың денсаулығын сақтау жүйесі дамып келеді. Аурудың алдын-алуға, диагностикалауға және медициналық қызметтердің сапасын арттыруға мән берілген. Соның арқасында халықтың өмір сүру ұзақтығы 75,8 жасқа жеткен. Өлім-жітім 2,6 пайыз, нәресте өлімі 18 процент қысқарды.