Балабақша тапшылығы реттеліп жатыр

Тәуелсіздік күні қарсаңында Алматыда білім бағытында бірқатар жаңа нысандар пайдалануға берілді. Соның бірі – Медеу ауданындағы №195 бөбекжай-балабақшасы. Бұрын жекеменшік қолда болған ғимарат таяуда мемлекет меншігіне өтті. Ғимарат сейсмалық талаптарға сәйкес, әрі материалдық-техникалық базасы да заманауи стандарттарға негізделген. Жаңа балабақшаның қандай екенін тілшіміз көріп қайтты.

Балабақшада 2 және 6 жас аралығындағы балалар үшін 8 топ ұйымдастырылған. Әр топта киім шешетін бөлме, жатын бөлме, буфет және санитарлық торап қарастырылған.

Гүлшат Беркімбаева, №195 бөбекжай-балабақшасының меңгерушісі:

– Балабақшаның материалдық-техникалық базасын толық жаңартып, сапалы ойыншықтар, оқу құралдары мен кітаптар алынды. Балалардың жан-жақты дамуына арналған заманауи интерактивті жабдықтар орнатылды.

Мемлекетке өткен бұл балабақша мектепке дейінгі орын тапшылығын азайтып, балаларға қауіпсіз және сапалы білім беру ортасын қамтамасыз етуге бағытталған. Жұмыстар алдағы уақытта да жалғасады.

Айдос Нұрлыбаев, Алматы қаласы Медеу ауданы әкімінің орынбасары:

– Тәуелсіздік күніне орай №99 мемлекеттік мектептің ашылуы жоспарлануда. Онда биыл күрделі жөндеу жүргізіліп, 300 балаға арналған жапсарлас қосымша ғимарат пайдалануға берілуде.

Қазіргі таңда Медеу ауданында 20 мемлекеттік және 80-нен астам жекеменшік балабақша жұмыс істейді. Онда шамамен 4 мыңға жуық бала мектепке дейінгі білім алуда.