Астана – тазалық пен тәртіптің үлгісі

Мәдениет қызметкерлері «Таза Қазақстан. Астана – тазалық пен тәртіптің үлгісі» экологиялық акциясы аясында жалпықалалық сенбілікке қатысты. Жүзге жуық театр тарландары мен эстрада жұлдыздары қолдарына күрек-кетпен алып, саябақ тазалауға шықты. Науқанның ұйымдастырылуына қалалық мәдениет басқармасы мұрындық болған.

Тазалық науқаны халықаралық «World Cleanup Day» күні аясында ұйымдастырылды. Акцияға Мәдениет басқармасының қызметкерлері, басқармаға қарасты мекемелер және елімізге танымал мәдениет жұлдыздары мен қайраткерлері қатысты. Басты мақсат – шаһар тазалығын сақтау, қорғашан ортаға құрмет көрсету. 

Ерлан Малаев, әнші: 

– Бүкіл шетелдіктер қандай керемет қала, қандай таза қала деп таңғалады. Біз үшін сондай мәртебе ғой. Біз келдік, бардық сондай таза қала деп. Сондықтан Астананың тазалығы Астанада тұрып жатқаннан кейін өзімізге жақсы біріншіден, екіншіден қаланың тазалығы келген қонақтарға жақсы. Сондықтан біз өнер адамдары жиналып бүгін бас қосып, бір шетінен арқа-жарқа болып. Көп болды бас қоспағалы. Бір шетінен қаланың тазалығына көңіл бөліп, қолғабыс жасап. 

Шаһар тазалығын әр адам өзінен бастауы керек. Қоқыс шығару мен тал егу – ауа сапасының жақсаруына да оң әсер етеді. Мұндай экологиялық акциялар еліміздің өзге де өңірлерінде тұрақты түрде жүргізіліп тұрады, - дейді науқан қатысушылары. 

Бақыт Қажбаев, актер: 

– Мұны енді мен өзге қалалардан көрдім. Маған ұнағаны жазда іс-сапармен Қызылорда қаласына барған кезде ол жақта әр аптаның сенбі-жексенбі күндері осындай сенбілік ұйымдастырады екен. Соның нәтижесі көз алдыңа бірден көрініп тұрады. Сол себепті әр тұрғын өзінің қаласына шығып, тазалық жұмыстарына қатысып тұрса нұр үстіне нұр.  

Экологиялық науқанда Желтоқсан көшесі мен Бейбітшілік көшесі қиылысындағы саябақ қоқыстан тазартылып, Керей мен Жәнібек хандар ескерткіші аумағына абаттандыру жұмыстары жүргізілді. Қаланың таза болуы – қоршаған ортаға деген құрметтің белгісі, - дейді өнер жұлдыздары.