Асанәлі Әшімовты аза тұту рәсімі өтті

Бүгін қазақ халқы ұлт өнерінің ұлы тұлғасы Асанәлі Әшімовты ақтық сапарға шығарып салды. Аңыз адам саналы ғұмырын кино мен театрға арнап, төл мәдениетіміздің туын биікке көтерді. Тағдырдың талай тауқыметіне сынбады. Көпке үлгі болды. Аза тұту рәсімінде Мемлекеттік кеңесші Ерлан Қарин Президент Қасым-Жомарт Тоқаевтың көңіл айту хатын оқып берді. Бұл қайғы баршаға ортақ екенін атап өтті.

¤

Күрсініс пен толқыныс. Бүгін Абай театрын теңселтіп тұрды. Асанәлі Әшімовтың әр қойылымынан кейінгі таныс әсер. Кимастықтың күшімен жүз еселенді. Жүректі шер торлады. Көмейге өксік тірелді. Жанарға жас тығылды. Бүгін ол театр сахнасын босатты, мәңгілік мекеніне аттанды.

Меруерт Өтекешова, Қазақстанның Еңбек сіңірген әртісі

- Жастар үшін жұмыс істеді, қанша тәрбие берді. Ол әр адамның қолынан келе бермейді. Асанәлі аға даже шаршап жүрсе де ешкімге көрсетпей, ары қарай жұмыс істеп жүрді.

Бақыт Беделхан, ақын:

- Абыз жасқа келіп, бүкіл алты алаштың алақанында тұрып, ақ өліммен кетудің өзі бір бақыт шығар деп ойлаймын. Өнері де, артында қалған дүниесі де халыққа әлі қызмет ететін өнеге болады.

«Тұлға теориясы». Осыдан үш ай бұрын «Jibek Joly» арнасынан эфирге шықты. Жоба авторы Айнұр Омар соңғылардың бірі боп аңыз адамнан сұқбат алды. Үш күн бойы актердің қасында жүріп, тағылымға толы әңгімесін тыңдады. Өткен өмірін, естеліктерін таспалады.

Айнұр Омар, журналист:

- Бағдарламаны жасау барысында әдемі қартаю дегенді ойладым. Сол кезде осы бағдарлама кейіпкерлерінің ішінде осы Асанәлі атадай қартаю бұйырсын деп ойладым. Өйткені, жұмысында да, халықтың арасында да, үйінде де, барлық жерде беделі бар. Қай жерде жүрсе де қазақтың Асанәлісі - Асанәлі болып қалды.

Өнердің хас дүлділі басынан өткен талай қиындыққа, көкірегін қарс айырған ауыр қасіретке сынбады. Қара емендей қарсы тұрды. Тағдыр талай теңселтсе де, өмірге өкпелемеді.

Асанәлі Әшімов, халық әртісі, Қазақстанның еңбек ері:

- Өмірім менің ұзаақ сияқты. Бірақ оған өкпем жоқ. Өмірім жаман өтті деп айта алмаймын.

Өнерімен өрнектелген өмірі, ойнаған рөлі талайға жұбаныш болды. «Қыз Жібек» фильміндегі Бекежан, «Атаманның ақырындағы» Шадияров, «Сарқырамадағы» Мәмбет рөлі халық жадында мәңгі жаңғырып тұрады.

Асанәлі Әшімов, халық әртісі, Қазақстанның еңбек ері:

- Қалибек Қуанышбаев, Елубай Өмірзақов, Серке Қожамқұлов, Құрманбек Жандарбеков, менің бақытым солармен араластым, үлкендермен араластым. Баяғы Сатпаевтарды көрдім. Қуанышбаев бастаған шалдарды көрдім. Солармен сахнада серіктес болдым. Оның бәрі - бақыт.

Қазақ киносының тау тұлғасы антагонистік образдарды сомдаудың шебері еді. Жағымсыз кейіпкерлердің өзін үнсіз сөйлете білді.

Асанәлі Әшімов, халық әртісі, Қазақстанның еңбек ері:

- Маған Бекежан немесе Төлегенді таңда десе, Бекежанды қайта таңдар едім. Өйткені мінез бар, актерге өте қолайлы. Қыз Жібек пен Атаманның ақыры бір жылда шықты екеуі. Сол кезде көшеде жүруге мүмкіншілік болмай қалды. Сол кезде кішкене болды, асылынқырап кеткен, оның жазасын алдым ғой енді. Компенсациясын... 

Тірісінде-ақ аңызға айналған адам. Дүйім жұрт оны алақанына салып аялады. Көкке көтерді. Халықтың осындай ыстық ықыласына ол да риза боп кетті.  

Асанәлі Әшімов, халық әртісі, Қазақстанның еңбек ері:

- Мен халық әртісімін деймін. Мен халық үшін қызмет атқарамын. Сондықтан елдеріңіз аман, жұрттарыңыз тыныш болсын. Әр уақытта біз сіздермен біргеміз!