Ақмола облысында жылыту орталығы іске қосылды

Ақмола облысы Дамса ауылында жылыту орталығы іске қосылды. Оның құрылысына небәрі 5 ай уақыт кеткен. Қуаты тәулігіне 3 мың кВт-қа жетеді.  Қазірдің өзінде орталық 50 шақты шаңырақты осы бірыңғай жылу желісіне қосты. Ал Бозайғыр ауылында суды сүзгіден өткізетін орталық салынды. Әлеуметтік маңызы бар нысандарды Зұлқарнай Ермұратұлы көріп келді. 

Валерий Давыденконың Дамса ауылына көшіп келгеніне 30 жылдан асқан. Ес білгелі пеш жағып, күл шығарып шаршағанын айтады. Ауылға орталықтандырылған жылу желісі қосылғалы бері, қолымыз ұзарып, шаруа жеңілдеді,-дейді.

Валерий Давыденко, ауыл тұрғыны:

- Қазір үйіміз жылы. Шаң жоқ, түтін жоқ. Әйелім де риза. Бұрын, айына кем дегенде көмір мен ағаш алуға 30 мың теңге жұмсайтынбыз. Қазір небәрі жылуға 14 мың теңге төлейміз. Бұл әлдеқайда тиімді.

Дамса ауылындағы жылыту қазандығының құрылысы мамырда басталып, осыдан үш ай бұрын қолданысқа берілді. Жоба құны 603 млн теңге. Мұнда үш бірдей қазандық бар. Оның тек екеуі жұмыс істейді. Біреуі резевте. Көмір салу, күл шығару процесінің барлығы автоматтандырылған. Оператор тек құрылғылардың қуатын бақылап отырады.

Александр Колесников, Шортанды аудандық ТҮКШ бөлімі басшысының м.а.:

- Бұл ауылда 30 жыл жылу болмаған. Қазір тұрғындар біртіндеп желіге қосылып жатыр. Жылу беріледі деген үміттен гөрі, күмән көп болды. Қазір, барлығы ойдағыдай. Алдағы уақытта ауыл халқын толық қамтимыз деген ойдамыз.

Ал, Астананың іргесіндегі Бозайғыр ауылында суды сүзгіден өткізу орталық салынды. Мамандар екі бірдей ұңғыма қазып, 7 шақырым құбыр орнатқан. Құрылғы сағатына 35 текше метр суды тазарта алады. Бұған бюджеттен 906 млн теңге бөлінді.

Серікбол Мерейұлы, Шортанды аудандық құрылыс бөлімінің басшысы:

- Сүзгіден өткеннен кейін, сыртта бізде екі су сақтау қоймасы бар. 300 кубтан 600 куб. Су сақтау қоймасына тазартылған су түскеннен кейін одан әрі ауылға жіберу насосный стансамыз бар. Сол станса арқылы ауылға су кетеді.

Айта кетейік, жүйе цифрландырылған. Операторлар процесті алыстан телефон арқылы да басқара алады. Бүгінде Бозайғыр ауылында 5 мыңннан астан адам тұрады. Тұғындар бұған дейін тазартылмаған суды тұтынып келген.

Авторы: Зұлқарнай Ермұратұлы, Наурыз Базаров