6 ірі электр стансасы салынады

Елде 6 ірі электр стансасы салынады. Олар 2030 жылға дейін Курчатов, Көкшетау, Семей, Өскемен және Жезқазған қалаларында бой көтермек. Бұлай деп бүгін Энергетика вице-министрі Ерлан Ақбаров мәлімдеді. Бұл кейбір өңірлерде халық санының артып, электр қуатына деген сұраныстың көбеюіне байланысты дейді жауаптылар. Ол Ұлттық жоба құжатының негізінде салынбақ. Осы ретте саланы дамыту үшін 360 млрд теңге жұмсалуы мүмкін.Аталған бағытта тағы қандай өзгерістер бар? Толығырақ, тілшіміз Мақпал Рахатқызы баяндасын.

Қазір еліміздегі электр энергиясының шамамен 65 пайызы көмірмен өндіріледі. Елдегі қатты отынмен жұмыс істейтін стансалар – 13,8 , газ стансалары – 6,8 , су электр стансалары – 2,5 гигаватт қуат береді.

Осы ретте, энергияны ең көп тұтынатын өңірлер де белгілі. Павлодар облысы – 24,5%, Қарағанды облысы – 18,1%, Атырау облысы – 9,6%. Бұл өңірлерде электрге  сұраныс жоғары болғандықтан, халықты тұрақты түрде қамтамасыз ету өте маңызды.

Сондықтан, елде электр қуатына деген тапшылықты жою үшін 2030 жылға дейін 6 ірі нысан салынуы керек. Олардың қатарында , Курчатов, Көкшетау, Семей, Өскемен және Жезқазған стансалары бар. Ал Екібастұзға мұндай нысанның үшіншісі бой көтермек. Ауқымды жұмыс көмір генерациясын дамытудың ұлттық жобасы аясында жүзеге асады.