1 млн шаршы метр тұрғын үй салынды

Жетісу облысында соңғы үш жылда 13 мыңдай отбасы баспаналы болды. 1 миллион шаршы метр үй салынды. Жаңа қонысқа жайғасқандардың  2 мыңдайы әлеуметтік осал топқа жатады. Яғни, үй тегін берілген. 388-і апатты баспанада тұрып келгендер. Өңірдің әлеуметтік өмірінде тағы қандай өзгеріс бар? Тілшіміз тарқатсын.

Кербұлақ ауданының Көксай ауылында 53 бала мектепке барады. Орын жеткілікті, тіпті артылып тұр. Бірақ дұрыс білім алуға жағдай жоқ. Ғимарат әбден ескірген, жамап-жасқауға келмейді. Сондықтан 1,4 миллиард теңгеге су жаңа мектеп салынып жатыр. Дәл осы сияқты өңірде 19 білім ошағы бой көтерген. 22 мектеп бастан аяқ жөндеуден өткен. Соның арқасында әне-міне құлайын деп тұрған білім ошақтарының саны 69-дан 38-ге қысқарған. Қазір облыста апатты жағдайдағы және үш ауысымды мектеп жоқ.

Бейбіт Исабаев, Жетісу облысының әкімі:

- Жұмыссыздық деңгейі – 4,7%-ға төмендеді. Атаулы әлеуметтік көмек алушылар саны екі есе азайды. Орташа айлық жалақы 18%-ға өсіп, 331 мың теңгені құраса, жан басына шаққандағы орташа табыс 19%-ға ұлғайып, 172 мың теңгеге жетті.

Айтпақшы 276 әлеуметтік нысан жаңартылды. Нақтырақ айтсақ, 149 медициналық мекеме салынып, 13 ғимарат жөнделген. 39 спорттық, 34 мәдениет нысаны пайдалануға берілді. Осылайша әкімдік мұндай мекемелердің тозу деңгейін 55 пайызға төмендеттік деп отыр. Бұдан бөлек, инвесторлар Талдықорған қаласында жабық мұз аренасын, спортшыларға арналған төрт қабатты тұрғын үй және екі үстел теннисі орталығын ашқан.

Бейбіт Исабаев, Жетісу облысының әкімі:

- Облыс құрылғанға дейін тек 5 елді мекен немесе облыс халқының 27% ғана газдандырылған болған. Жыл соңына дейін барлығы 126 елді мекенге газ құбыры тартылады. Газдандыру деңгейі 72%-ға жетеді. Биыл «Талдықорған-Үшарал» магистральды газ құбырының құрылысы аяқталды.

Өндіріс пен агросекторды айтпағанда облыс бюджетіне туризм саласынан түсетін пайда ұшан- теңіз. Жыл сайын Жетісудың табиғатын аңсап келетіндер 2 миллионнан асады. Әкімдік қонақ күтіп пайда табу ісіне білек сыбана кіріскен сияқты. Өйткені салаға 53 миллиард теңге бөлініпті. Бұл қаржыға 64 жаңа нысан салынған. Енді саяхатшылар жаңа қонақ үйлер мен заманауи қызметке қол жеткізеді.